Nga Ema Shazivari
Jemi afër vitit 2018 dhe virgjëria ende vazhdon të mbetet kriter. Duke parë që mentaliteti e ngre në piedestal cipën e himenit, një tjetër ide ka lindur në kokën e vajzave shqiptare. Shumë vajza kanë filluar që ta ruajnë virgjërinë me një synimin e të bërit më pas biznes me të. Vetëm në 1 muaj dy raste kanë qarkulluar nëpër portale ku reklamohet ankandi i virgjërisë.
E para ishte një vajzë nga Durrësi e cila e niste ankandin e virgjërisë së saj me 20.000 euro. Arsyetimi është i thjeshtë, “nuk ja vlen ta japësh falas”. Kështu mendojnë vajzat shqiptare së fundmi mesa duket. Nga ana tjetër një tjetër vajzë shqiptare ka zgjedhur një faqe të huaj eskortash, ku me çertifikatë mjekësore hedh në ankand virgjërinë e saj.
Po pse ky fenomen po përhapet kaq fuqishëm në një vend të vogël dhe me mentalitet të mbyllur si Shqipëria? Shkaqet mund të jenë të shumta, deri te ato më banalet, por duket se varfëria dhe dëshira për të përmbushur standardet e Instagramit, po i “detyron” vajzat të bëjnë tregti me trupin e tyre.
Nëse më parë humbja e virgjërisë për femrat mund të ishte si një natë e paharruar, me një person të veçantë me të cilin do e mbanin mend gjatë, sot kjo gjë pothuajse ka vdekur. Sot femrat kanë të tjera synime dhe dashuria nuk është më një prej tyre. Në kapitalizmin e egër çdo gjë lidhet me pushtetin dhe paranë, edhe ato që më parë ishin shpirtërore.
Në një vend me dy standarte si Shqipëria, luksi që promovohet në Instagram dhe në rrjetet e ndryshme sociale kërkon sakrifica, dhe ndonjëherë femrat bëjnë kurban veten e tyre për pak luks dhe para.
Është çështje morali? Jo aspak, kapitalizmi nuk e njeh fjalën moral. Edukata e familjes dhe normat që na kanë mësuar që në vegjëli vdesin që në momentin kur pushimet e shtrenjta dhe rrobat firmati na shkelin syrin. Dashuria është flijuar sot nga leku, dhe virgjëria nuk bën përjashtim. Prostitutat moderne quhen “eskorta” dhe mesa duket profesioni më i vjetër në botë do vazhdojë të lulëzojë për shumë kohë…
