Nuk ishte i kënaqur me punën që i kishte kryer një dentist turk që punon në Tiranë, por i riu që ka bërë denoncimin në prokurori është gjetur fajtor për kallëzim të rremë.
L.K kishte bërë kallëzim në Prokurorinë e Tiranës, pasi pretendonte se sttomatologu turk N.U jo vetëm nuk i kishte shërbyer në mënyrë cilësore por e ushtronte aktivitetin e tij pa pasur shkollimin e duhur dhe licencën.
Prokuroria e Tiranës ka nisur menjëherë verifikimet nga ku ka dalë se pretendimet e të pandehurit janë të rreme dhe për këtë arsye e ka shpallur fajtor, duke u dënuar me 200 mijë lekë të reja gjobë.
Gjithçka ka nisur kur L.K. ka pasur dhimbje nga një dhëmballë dhe ka shkuar në klinikën dentare të shtetasit turk N.U. në rrugën “Kajo Karafili” në Tiranë. Pasi ka kryer shërbimin për dhëmbin në fjalë, i riu ka vendosur të rregullojë edhe disa dhëmbë të tjerë, duke paguar në fund një vlerë totale prej 1.400 eurosh. Ai ka rënë dakord që pagesën ta kryejë me këste. Më pas, i riu ka pasur probleme me dhëmbët, siç ka kallëzuar, dhe ka shkuar në Prokurori duke denoncuar stomatologun.
Sipas tij, ai nuk i ka lëshuar kupon tatimor dhe se nga investigimet e tij, mjeku stomatolog nuk ka formimin e duhur arsimor. Prokuroria nisi hetimet dhe në përfundim të tyre vendosi të marrë si të pandehur L.K., duke e akuzuar për “Kallëzim të rremë”. Edhe Gjykata vendosi dënimin e tij me 300 mijë lekë gjobë, por nga gjykimi i shkurtuar, vlera shkon në 200 mijë lekë gjobë, plus shpenzimet gjyqësore.
