Gjykata e Elbasanit ka vendosur të lërë në burg pa afat, 27-vjeçarin Aldiron Shehu, i cili dy ditë më parë shkaktoi një aksident të trefishtë pasi ndiqej nga policia.
Ai akuzohet për vrasje të punonjësit te policisë mbetur ne tentative dhe mosbindje të urdhrit të policisë.
Policia e Elbasanit ishte vënë në ndjekje të Shehut që nga Pogradeci por ai nuk i ishte bindur tre postblloqeve duke detyruar kështu forcat e rendit të ndërhyjë forcërisht për ndalimin e tij.
Kur ishte në hyrje të Elbasanit, policia ka hedhur zinxhirë me gozhdë për çarjen e gomave të makinës ‘Volkswagen Passat’ duke bërë që ai të kalojë në anën tjetër të rrugës, gjë e cila solli edhe përplasjen me mjete të tjera.
Për pasojë u plagosën pesë persona dhe një efektiv i forcave Shqiponja të Elbasanit, Eugen Abdurrazaku. Ky i fundit u dërguar në spitalin e Traumës pasi u dëmtua rëndë në njërën këmbë ndërsa të plagosurit e tjerë u përcollën në spitalin e Elbasanit pa dëmtime serioze.
Sipas dëshmisë së 27-vjeçarit një fuoristradë i ishte vënë nga pas që në Devoll duke e detyruar të largohej me shpejtësi dhe rrjedhimisht nuk i ndaloi postblloqeve të policisë. Ai rezulton me precedentë penal pasi të njëjtin episod e ka kryer edhe gjatë vitit 2018. Në brendësi të makinës së tij janë gjetur një sërë targash false, të cilat ende nuk është mësuar se për çfarë do të përdoreshin.
Në sallë nuk pati asnjë familjar të 27-vjecarit nga Gjirokastra. /Opinion.al
