Dëshmia e njërit prej të plagosurve në Durrës zbardhi ngjarjen me armë zjarri ku mbetën të plagosur shoku i tij dhe një i ri tjetër.
Gjithçka nisi pas sherrit të pak ditëve më parë ndërmjet Ervin Qerimit dhe nipit të pronarit të pallatit ku ai kishte blerë një hyrje për banesë, Elvis Kurti
Sipas dëshmisë së dhënë në spital për hetimorët nga ana e Qerimit, i cili u plagos me thikë, pesë ditë më parë ai i kishte kërkuar llogari shtetasit Elvis Kurti, nip i pronarit të lokalit. Kjo pasi pallati nuk kishte përfunduar në afatin e parashikuar në kontratën e shitblerjes, e cila ishte firmosur para noterit.
Ervin Qerimi, i cili donte të futej sa më parë në banesën që kishte blerë, ka shkuar për të parë nga afër shtëpinë, pasi, sipas kontratës së bërë, duhej të kishte përfunduar. Por aty ai ka parë se nuk kishin përfunduar ende instalimet hidraulike e për pasojë nuk mund të futej ende në shtëpinë e blerë.
“Nuk ishin bërë akoma lidhjet e instalimeve hidraulike në kuzhinë dhe në tualet, dhe as lidhja e shkarkimeve të lavamanëve. Kjo më irritoi pasi unë kisha një kontratë, e cila nuk po respektohej nga pronari i pallatit. Pas kësaj kam debatuar me nipin e tij, por pa menduar se mund të përfundonte deri në këtë pikë”, është shprehur për hetimorët Ervin Qerimi.
“Më datë 12.03.2016, në lagjen nr.11, Durrës, pas një konflikti çasti, në një dyqan shitje kafesh, shtetasit Ervin Qerimi dhe Eluert Hoxha janë konfliktuar me shtetasit Elvis Kurti dhe Bekim Gjoka. Për pasojë, është plagosur me armë shtetasi Elvis Kurti. Gjithashtu është plagosur me armë zjarri aksidentalisht në këmbë edhe shtetasi Eluert Hoxha.
Ervin Qerimi mbeti i plagosur me thikë.
Gjithashtu është shpallur në kërkim dhe po punohet për kapjen e shtetasit Bekim Gjoka, 36 vjeç, banues në Durrës, i përfshirë në konflikt.
Të tre personave të mbetur të plagosur gjatë konfliktit iu është komunikuar arrestimi në spital, teksa merrnin ndihmën mjekë sore”, bëri të ditur dje Policia e Durrësit.
“Shkak për sherrin mes të rinjve janë bërë disa pajisje hidraulike që mungonin në apartamentin e ri të shtetasit Ervin Qerimi.
Ngjarja e ka zanafillën në një mosmarrëveshje të 5 ditëve më parë, kur shtetasi Ervin Qerimi, 31 vjeç, blerësi i apartamentit, i ka kërkuar llogari nipit të pronarit të pallatit, Elvis Kurtit, se përse mungonin pajisjet hidraulike në tualet.
Kjo kërkesë e tij ka degjeneruar në përplasje fizike mes palëve, derisa pas pesë ditësh precipitoi me përdorimin e armës së zjarrit dhe thikave”, bënë të ditur burime nga grupi hetimor./ Panorama.al
