Më shumë se për meritë të tyre, për pamundësi dhe pafuqi të kundërshtarit modest, skuadra e Tiranës është rikthyer sot te fitorja që i mungonte bardhebluve që prej 13 shkurtit.
Një fitore e thellë në shifrat 3-0, ndaj Tërbunit të vendit të fundit, me një autor të vetë, Elis Bakaj që ka udhëhequr bardheblutë drejt fitores që afron 24 herë kampionët më shumë me vendin e tretë të klasifikimit, duke parakaluar Teutën.
Gjithsesi, e pamjaftueshme ka qenë kjo fitore për të zbutur marrëdhënien tashmë të ngrirë prej javësh me tifozët. Këta të fundit i kanë rezervuar drejtuesve të Tiranës një surprizë të hidhur, teksa në minutat e fundit kanë fluturuar mbi stadiumin “Selman Stërmasi” një dron ku varej një baneri që u kujtonte krerëve bardheblu detyrimin ndaj tifozëve.
