Kryeministri Edi Rama ka kritikuar përsëri kërkesën për rritje të pagave të gjyqtarëve dhe prokurorëve.
Kreu i qeverisë në një postim në rrjetet sociale ka publikuar shifrat se sa e kanë pagën gjyqtarët dhe prokurorët si dhe se sa është shuma që ata kërkojnë që të shtohet mbi pagën e tyre.
Sipas tij,një kërkesë e tillë ndodh për sa kohë një vendim gjykate merr kompetencat e kryeministrit, duke iu referuar rastit të Belinda Ballukut.
Më tej, Rama shkruan se ai nuk e “hallin” te një ministër por te rreziku që i përmbysjes së demokracisë në vendin tonë.
“S’ka mundësi”, më shkruajnë disa, lidhur me kërkesën e gjyqtarëve për ta rritur pagën me 1600 Euro mbi aktualen! Jo vetëm që ka mundësi, po 1600 Euro është rritja që kërkojnë magjistratët e këshilltarët e zakonshëm, se mes rritjekërkuesve janë edhe specialët, pra ata të GJKKO dhe SPAK-ut, të cilët kanë pagat më të larta në republikë, por kërkojnë edhe një rritje prej 3100 Eurosh!
Po, asnjë shaka, detin ku aktualisht marrin 6130 Euro në muaj, tani duan që t’ua kthejë në kos Gjykata Kushtetuese me 3100 Euro plus, e si përfundim të marrin 9230 Euro në muaj. Si ka mundësi?!
Ka mundësi si jo, kur arrin të ndryshosh edhe qeverinë me një vendim gjykate, duke marrë kompetencat e kryeministrit, Presidentit e parlamentit bashkë, pa pasur marrë një kokërr vote të vetme nga populli tërë jetën tënde, si nuk arrike të marrësh nga arka e shtetit me një vendim tjetër gjykate, mijëra euro për të rritur pagën tënde?!
Kush ka mbetur pa e kuptuar që s’e kam hallin tek një ministër unë, po tek rreziku real i përmbysjes së balancës demokratike mes pushteteve?!
