Kryeministri në detyrë i Kosovës, Ramush Haradinaj ka deklaruar se kryeministri Rama ka marrë pjesë në projeksionet e ndarjes së Kosovës.
Në një intervistë televizive Haradinaj u pyet lidhur me deklaratat e kryeministrit Rama se do të hapte një proces gjyqësor ndaj Haradinajt për deklaratat e këtij të fundit se përkrahësit e ndarjes së Kosovës do të ndanin mes tyre 10 miliardë dollarë.
“Edi Ramën e kam vëlla. I kam vëllezër e motra të gjithë shqiptarët. Por unë jam kundër ndarjes. Ky ka marrë pjesë në projektin e ndarjes (Rama). Ajo ndarja do të bënte dëme në shtetësinë tonë. Pasi që të hapet Kosova e 17 shkurtit nuk ka më kthim pas”, tha Haradinaj.
Sa i përket gjyqit ai tha se e respektonte të drejtën e procesit gjyqësor të çdo qytetari.
“Dëmi mbrapa do të ishte mbi 10 miliardë në rezervat minerare të Kosovës në veri. Tani nuk e di a do të jetë kryeministri shqiptar në detyrë, sa është në detyrë se ai ka plot punë e të merret me to, po nëse është në opozitë të vazhdojmë ne me gjyqet bashkë” deklaroi Haradinaj.
Ai shtoi se përfitimet e atyre që mbështesnin projektin e ndarjes së territoreve të Kosovës do të vinin nga një ofertë prej Serbisë në rast se asaj do ti jepej Trepça.
“Nëse dikush ka premtuar me dhënë Trepçën, atëherë ka pasur përfitime nga Serbia. Projektuesit e ndarjes së Kosovës nuk kanë mundur të jenë të pavetëdijshëm për pasojat politike, të sigurisë dhe ekonomike” tha kryeministri në detyrë. /Opinion.al
