Në Francë, kardinali Philippe Barbarin është dënuar me gjashtë muaj burg, me akuzën se nuk ka denoncuar abuzimet seksuale ndaj minorenëve nga ana e ish-priftit Bernard Preynat. Këto abuzime kanë ndodhur në vitet ’80 dhe ’90, ku nëntë burra kanë akuzuar priftin Preynat se ka abuzuar seksualisht me ta kur ishin fëmijë.
Ndërkohë, Philippe Barbarin, Arqipeshkv i Lionit, ka thënë gjatë procesit se është i pafajshëm. “Nuk di se për çfarë po akuzohem. Kurrë nuk kam kërkuar as të fsheh dhe as të mbuloj këto fakte të tmerrshme”, ka thënë ai. Kardinali Barbarin ka thënë se është vënë në dijeni vetëm në vitin 2014 dhe se do ta apelojë vendimin.
Bazuar në historinë e abuzimeve të ish-priftit Preynat është realizuar edhe një film nga regjisore francez François Ozon, “Grace a Dieu”, që sapo ka dalë në kinematë franceze./Opinion.al
