Një rast “i çuditshëm” është trajtuar në emisionin Boom, ku një noter nuk pranon të lëshojë një dokument, përveçse duke u paraqitur një person i cili ka vdekur. Shtëpia është shitur 19 vjet më parë, dhe pronari i saj (pronarja) ka kërkuar regjistrimin e saj në hipotekë. Për këtë i nevojitej planvendosja e shtëpisë që ndodhet në fshatin Tregan të Elbasanit. Zonja Bukurije Bezati është interesuar pranë zyrës së Rregjistrimit të Pasurive të Paluejtshme, ku ka mësuar se i duhej ta merrte këtë dokument pranë noterit ku ishte bërë shitja e apartamentit. Por këtu ka hasur problemin që nuk e priste. Noteri nuk e jepte plan vendosjen, duke kërkuar që i pranishëm të ishte personi që kishte shitur shtëpinë. Megjithëse i është bërë e ditur se ai ka vdekur, noteri këmbëngulte se kështu e kishte ligji. Ndoshta ligji është vërtetë kështu që detyron edhe të vdekurit në raste të tilla, ndoshta noteri nuk ka qenë në dijeni të ligjeve, por e vërteta është se për të marrë dokumentin që i duhej për të riregjistruar pronën e saj, qytetares iu desh ndërhyrja e emisionit Boom.
