Një ngjarje e rëndë është denoncuar dje, 5 maj, në zonën e Golemit, ku një grua 69-vjeçare dhe djali i saj, Rexhep Ademi, pretendojnë se janë dhunuar nga persona të lidhur me biznesin si dhe efektivë të policisë, për shkak të një konflikti pronësie. E moshuara është parë me shenja të dukshme mavijosjeje në trup, ndërsa mbi rastin ka dy versione…
Policia e Durrësit ka reaguar për “Opinion” këtë mbrëmje, 6 maj, duke dhënë sqaruar dy videot që kanë qarkulluar në rrjet.
Sipas policisë, pamjet lidhen me dy ngjarje të ndryshme të ndodhura në kohë të ndryshme. Pjesa e parë, thonë blutë, i përket një incidenti të ndodhur më 22 dhjetor 2025 në Golem, ku Ademi dyshohet se është dhunuar nga dy persona pas një konflikti për motive pronësie. Ndërsa pjesa e dytë e videos lidhet me një ngjarje të ndodhur më 4 maj 2026 në Kavajë, ku 69-vjeçarja ka spërkatur me lëndë djegëse (benzinë) një kontejner që i përket një subjekti ndërtimi. Për më tepër, theksojnë se e moshuara ka kundërshtuar punonjësit e policisë duke i goditur dhe kafshuar.
Në një lidhje direkte për emisionin, Rexhep Ademi i hodhi poshtë këto pretendime, duke i cilësuar si absurde.
“Nona ime s’ka dhëmbë, këta thonë ka kafshuar policët”, tha ai, duke theksuar se “nënën e tij e kanë goditur”.
Ademi shton se prona e tyre është zaptuar dhe se familjes nuk i lejohet të hyjë në banesë. Sipas tij, në zonë është vendosur një gardh metalik rreth 4 metra i lartë, me qëllim që të pengohet edhe kapja e pamjeve nga kamerat e sigurisë.
