Deputeti demokrat, Flamur Noka, në një status në rrjetet sociale, ka publikuar disa dokumente ku thotë se lejen e ndërtimit Jamarbër Malltezit, ia ka dhënë kryeministri Rama dhe jo Sali Berisha.
Ai nuk i ndal akuzat as për prokuroren e çështjes, Enkeleda Millonai.
“Heqjen nga kompleks sportiv dhe kalimin në truall të pronës së Ish klubit Partizani (pronë e vjetër e 5 Familjeve të mëdha të Tiranës) e ka dhënë Edi Rama …Lejen e ndërtimit Jamarbër Malltezit ia ka dhënë Edi Rama e jo Sali Berisha…Ja fotokopja e lejes Ndërtimit…. Prove e jo dokërr alla Millonai”, shkruan Noka.
Aktualisht Sali Berisha është nën masën detyrim paraqitje dhe nuk mund të largohet nga vendi në lidhje me dosjen e privatizimit të ish-kompleksit Partizani.
Ndërkohë, dhëndri i tij, Jamarbër Malltezi dyshohet se ka konsumuar veprën penale të “Korrupsioni pasiv të funksionarëve të lartë shtetërore ose të zgjedhurve vendorë”, kryer në bashkëpunim me Berishën, pasi në marrëveshje me këtë të fundit, duke shfrytëzuar pushtetin e ish-kryeministrit, ka arritur të marrë përfitimet e parregullta.
