Deputeti i Partisë Demokratike, Flamur Noka, shprehet se kryedemokrati, Lulzim Basha nuk ka kompetenca për të ndaluar mbledhjen e Kuvendit Kombëtar.
Në “Klan News”, Noka tha se nisma e Sali Berishës është bërë për t’i bashkuar demokratët dhe jo siç bëri Lulzim Basha që i ndau me vendimin e tij për përjashtimin nga grupi parlamentar të liderit historik.
Deputeti thekson se Basha nuk ka shanse për ta nxjerrë PD fituese në zgjedhje.
“Basha nuk ka kompetencë as për të pranuar dhe as për ta ndaluar mbledhjen e Kuvendit. Thjesht e bëra me dije këtë dhe ia bëj me dije përsëri që Zoti Basha mos t’i fryjë çështjes së antiamerikanizmit, është një çështje inekzistente në PD. Foltorja tenton t’i bashkojë demokratët dhe jo t’i përçajë siç bëri Basha me vendimin e tij. Pra Basha, atë që kishte në dorë e bëri, e përçau PD me atë vendim dhe sot PD nuk është më ajo që ishte e para vendimit. Sot PD ka një ndryshim të madh. Ka bazën e partisë e cila është e gjitha kundër atij vendimi. Ka deputetët që janë kundër atij vendimi, por që mbahen nën presion dhe kryetarin e partisë që është i vetmi që mbështet atë vendim. Ai e ka pohuar me gojën e tij edhe në mbledhje të grupit dhe takime të tjera që “unë e dija që baza ishte kundër, nuk doja të fusja në përçarje dhe prandaj e mora vetë”. Është i qartë që organet drejtuese të partisë nuk ishin dakord me partinë”. “Ne kërkojmë largimin e Bashës sepse është përçarësi i PD. Ai (Basha) është njeriu që pas 30 vjetësh e përçau PD. Kanë tentuar kundërshtarët tanë edhe në ’97, 2005, dhe nuk e kanë arritur. E bëri vetë kryetari me një vendim. Basha nuk ia ka dalë të mundë Edi Ramën. Imagjinoni pas kësaj përçarje edhe ta drejtojë, edhe ta bashkojë, por edhe ta bëjë fituese këtë forcë. Shanset për këtë gjë Basha i ka Zero. Ndaj po kërkojmë që të largohet, të japë dorëheqjen, sepse Kuvendi do ta largojë. Kërkojmë ta largojmë sepse forca politike që ai drejton është e përçarë prej vendimeve të tij”,-tha Noka./Opinion.al
