Javës që shkoi 6.6 milionë amerikanë aplikuan për të marrë asistencën e të papunëve sipas raportit të Departamentit të Punës.
Kjo shifër e çon totalin e personave që kanë humbur zyrtarisht punën në SHBA në 16 milionë në vetëm tre javë. Nju Jork Tajms e quan këtë situatë sikur ekonomia krejt papritmas ka rënë në një vrimë të zezë.
“Me shpejtësi marramendëse, pandemia ka mbyllur si bizneset e vjetëra ashtu edhe ato të reja, duke lënë punëtorë veteranë dhe të punësuar të kohëve të fundit në pothuajse çdo lloj industrie pa një çek. Në vetëm tre javë, më shumë se 16 milion punëtorë amerikanë kanë humbur punën e tyre, më shumë humbje sesa shkaktoi recesioni më i fundit gjatë dy viteve”, shkruan Nju Jork Tajms.
Teksa pandemia e koronavirsit ka çarë në mes ekonominë amerikanë shumë analistë të Wall Street pranojnë se në këtë pikë, parashikimet nuk janë asgjë më tepër sesa supozime. Ndalja e qëllimshme dhe e papritur e veprimtarisë ekonomike nuk ka precedent dhe askush nuk e di se kur do të hiqen kufizimet për lëvizjen dhe tregtinë. /Opinion.al
