Marrëveshja me Italinë për njohjen e pensioneve u bë e 16-a e nënshkruar për mbrojtjen sociale nga Shqipëria. Zv/ministrja e Financave, Olta Manjani, bëri me dije se edhe pjesa më e madhe e marrëveshjeve të tjera janë me vende të rëndësishme të BE-së ku ka prani të lartë të shqiptarëve. Këtu përfshihen, Gjermania, Austria, Zvicra, Belgjika, Bullgaria, Hungaria, Luksemburgu e për të vijuar më tej me Maqedoninë e Veriut, Malin e Zi e deri në Turqi.
Por siç bëri me dije zv/ministrja Manjani, qeveria shqiptare ka në proces negocimi edhe 18 marrëveshje të tjera.
Një nga më të rëndësishmet është ajo me Greqinë, kjo edhe për faktin se ka një numër të lartë shqiptarësh që jetojnë dhe punojnë atje. Manjani tregoi se deri më tani janë zhvilluar dy takime në nivel teknik. Ajo theksoi se shumë shpejt Shqipëria do i kërkojë Greqisë fillimin zyrtar të negociatave.
“Kemi bërë dy takime shumë të rëndësishme në nivel teknik me Greqinë. Kemi shkëmbyer informacion për mënyrën si funksionojnë institucionet ona homologe të fushës së sigurimeve shoqërore. Qeveria shqiptare ka bërë gati grupin negociator për negocimin e kësaj marrëveshjeje. Jemi në fazën, që shumë shpejt do i dërgojmë shtetit fqinj kërkesën zyrtare për të filluar zyrtarisht negociatat”, tha zv/ministrja për Klan News.
