Ka shkuar në dy numri i kryetarëve të Bashkive opozitare që janë proceduar penalisht nga policia. Fillimisht Policia e Lezhës do të njoftonte se kishte nisur hetimet në gjendje të lirë për kryetarin e Bashkisë, Fran Frrokaj. Sipas policisë 54-vjeçari akuzohet për veprën penale “Pengimi i subjekteve zgjedhore”.
“Gjatë një emisioni televiziv ai dyshohet se ka konsumuar elementët e veprës penale “Pengim i subjekteve zgjedhore””, njofton policia.
Vetë deklarata e policisë duket e pakuptimtë, pasi akuza e ngritur është pengim i subjekteve zgjedhore, por nga një emision televiziv. Dy ditë më parë, Frrokaj ka thënë se në 30 qershor do të mbronte pronat nën administrimin e bashkisë.
Po ashtu policia e Fierit do të njoftonte se hetimi ka nisur edhe për kryetarin e Bashkisë Mallakastër. Agran Kapllanaj akuzohet për “Thirrje për veprime të dhunshme”gjatë një emisioni televiziv.
Të martën Bashkitë e drejtuara nga opozita i kanë bërë thirrje Komisionit Qendror të Zgjedhjeve që të ndalojë çdo proces në lidhje me organizimin e zgjedhjeve të 30 qershorit. Ata i kanë dhënë afat deri më 27 Qershor KQZ-së në të kundërt, materialet zgjedhore do të asgjësohen.
Bashkitë që janë nën drejtimin e opozitës kanë vënë në dijeni Komisionin Qendror të Zgjedhjeve se asnjë vendim i paligjshëm i këtij Komisioni nuk do t’i pengojë ato të marrin nën administrim ambientet në pronësinë e tyre, të zëna nga komisionet e administrimit zonal dhe grupet e numërimit.
Bashkitë që drejtohen nga opozita i kanë dërguar të njëjtën shkresë njëkohësisht KQZ-së, ku vihet në dukje se i vetmi vendim për zgjedhjet, me fuqi ligjore, është dekreti i presidentit, që ka shfuqizuar datën 30 Qershor./ Opinion.al
