Autoriteti i Mbikqyrjes Financiare i ka bërë thirrje qytetarëve të prekur nga tërmeti që kanë siguruar banesat e tyre nga katastrofat natyrore që të kontaktojnë menjëherë shoqërinë e sigurimit për ta njoftuar për dëmet e ndodhura.
Përmes një njoftimi zyrtar AMF informon familjet e prekura që pasi të kenë njoftuar zyrtarisht ndodhjen e ngjarjes së siguruar, një ekspert i shoqërisë së sigurimit do paraqitet në pronën e dëmtuar për të evidentuar dëmet.
Gjithashtu Autoriteti tërheq vëmendjen e qytetarëve të bëjnë kujdes dhe ta njoftojnë shoqërinë e sigurimit brenda afateve të përcaktuara në kontratën e sigurimit.
Qytetarët e prekur mund të kontaktojnë shoqëritë e sigurimit të adresat e selive qendrore apo në zyrat që ato kanë në rrethe për të njoftuar dëmtimet e ndodhura në banesë si dhe për t’u informuar me detaje në lidhje me procedurat dhe afatet e trajtimit të kërkesave për dëmshpërblim.
Ndërsa ata që kanë marrë një kredi bankare sipas AMF mund të kontaktojnë edhe bankën për t’u informuar nëse e kanë të siguruar pronën, si dhe për të kërkuar asistencën që iu nevojitet. /Opinion.al
