Kompania e fluturimeve “Adria Airways” ka ndërprerë përkohësisht fluturimet si pasojë e problemeve financiare.
Autoriteti Aviacionit Civil (AAC) ka bërë me dije se më datë 23/09/2019 pas mesnate kompania ka vendosur, “ndalimin e përkohshëm të fluturimeve, për datat 24-25 Shtator 2019”.
“Adria Airways njofton se, që prej orës 23:30 (LT), të datës 23 shtator 2019, do të ndërpres përkohësisht të gjitha fluturimet (e martë, 24 shtator dhe e mërkurë, 25 shtator) në të gjitha bazat e saj (Lubjanë, Prishtinë, Tiranë).
Vendimi për të ndaluar përkohësisht fluturimet, vjen si pasojë e pasigurisë aktuale për të siguruar të ardhura, që kompania ajrore ka nevojë për të vijuar operimin e mëtejshën të fluturimeve. Në këtë pikë, kompania është duke kërkuar intensivisht zgjidhje, në bashkëpunim me investitorë të mundshëm. Qëllimi jonë i përbashkët është që Adria Airways të fluturojë përsëri dhe që ndërprerja e operimeve është me të vërtetë e përkohshme” shkruhet në njoftimin e kompanisë.
Kompania këshillon gjithashtu pasagjerët që parashikonin të fluturonin me këtë kompani që të kontrollojnë, se cila është kompania ajrore me të cilën ata do të udhëtojnë, para se të arrijnë në aeroport dhe nëse është Adria Airways, atëherë të kontaktojnë menjëherë zyrat e shitjeve ku kanë blerë biletat. /Opinion.al
