NASA kërkon që njeriu i parë i cili do të shkelë në planetin Mars të jetë grua. Këtë e ka bërë të ditur Administratori i NASA-s Jim Bridenstine duke folur mbi projektet e ardhshme hapësinore. Gjithashtu amerikanët kërkojnë që të rikthehen në Hënë, këtë herë me një grua. “Po presim me padurim çastin për të parë gruan e parë në Hënë”, ka thënë Bridenstine.
Pikërisht disa ditë më parë, NASA shpalosi objektivin për t’u rikthyer sërish në Hënë, për të qëndruar gjatë atje. Bridenstine ka në dispozicion një super buxhet prej 21 miliardë dollarësh, të miratuar nga qeveria amerikane për vitin 2020, ndaj ka nisur projektin e eksplorimit të Hënës dhe të Marsit me programin #Moon2Mars.
NASA së bashku me agjencitë hapësinore të Europës, Kanadasë, Japonisë dhe Rusisë, do të ndërtojë një stacion hapësinor në orbitën e Hënës. Do të quhet Gateway sepse “është korridori i kalimit për hapa të tjerë përpara, me qëllim arritjen e Marsit”, ka thënë Bridenstine.
Deri më tani, shumë gra kanë fluturuar në hapësirë, por pa arritur të ecin në Hënë. E para ka qenë sovjetikja Valentina Tereshkova e cila në qershor të vitit 1963 përshkoi 49 orbita tokësore në një mision që zgjati tre ditë./Opinion.al
