Detaje të reja janë zbardhur nga megaoperacioni i policisë, i zhvilluar mbrëmjen e së martës në disa burgje, ku në pranga ranë policë burgjesh, zyrtarë, biznesmenë dhe persona të dënuar.
Mes emrave të të arrestuarve rezultojnë edhe persona të njohur për drejtësinë shqiptare. Kështu, pjesë e grupit janë edhe shtetasit Gazmir Braka dhe Arben Grori, të dy të dënuar për vepra të rënda penale.
Gazmir Braka njihet si“Gaxhai” në Vlorë dhe kundërshtari i Zani Çaushit. “Gaxhai” është i dënuar 2 herë me burgim të përjetshëm, vendimi i parë i është dhënë për vrasjen e Ilir Pajës dhe Arbën Xhungës, dy shokëve të Lulzim Berishës në Durrës; ndërsa dënimi i dytë i është dhënë për vrasjen e Bashkim Dules, Sadik Kurti, Avdul Bajrami, Dhimitraq Mishka, Zini Haruni, Robert Myftari, dhe policit Viron Rrapaj. Ai është një emër i njohur për drejtësinë, pasi vrasjet dhe përplasjet me grupin e Zani Çaushit kanë nisur që në vitin 1997.
Nga ana tjetër, edhe Arben Grori rezulton një emër i njohur për drejtësinë, i dënuar edhe ky më burgim të përjetshëm për vrasje. Ai akuzohet për vrasjen e Naim Zyberit në Itali, pasi ky i fundit kishte rezultuar vrasësi i vëllait të tij, Artur Grori; ndërsa në Shqipëri është akuzuar dhe dënuar me 15 vite burg për trafik droge.
