Presidenti Ilir Meta ka kujtuar sot një vjetorin e tërmetit të 26 nëntorit, ku humbën jetën 51 persona.
Kreu i Shtetit në një deklaratë për mediat tha se edhe pse ka kaluar një vit ende nuk është garantuar një strehim i sigurt për shumë familje, banesat e të cilave u dëmtuan nga tërmeti.
Sipas Metës, drejtësia duhet të hetojë përgjegjësit për cilësitë e ndërtimeve të pallateve dhe shtëpive të qytetarëve.
“Sot është përvjetori i tërmetit të fortë dhe të rëndë që mori 51 jetë të qytetarëve tanë dhe që shkatërroi banesat e shumë qytetarëve. Dua të shpreh solidaritetin më të thellë. Një vit më pas, është e papranueshme, që ende nuk është garantuar një strehim i sigurt për shumë familje të goditura më rëndë nga tërmeti. Kushtet e vështira ku jetojnë shumë prej tyre i ekspozojnë edhe më shumë ndaj pandemisë. Të shtohen të gjitha përpjekjet për të qenë sa më pranë tyre, me sa më pak propagandë dhe sa më shumë punë e transparencë. Ndërkohë drejtësia duhet të tregojë kush do të mbajë përgjegjësi për cilësitë skandaloze të shumë pallateve dhe pronave të qytetarëve. Falenderim për të gjitha vendeve mike për ndihmat bujare ndaj popullit shqiptar”, tha Meta./Opinion.al
