Një valë e dytë e koronavirusit do të përfshijë botën më vonë gjatë vitit, me shumë gjasë nga vjeshta.
Ky është paralajmërimi që vjen nga Presidenti i Koresë së Jugut, Moon Jae-In, i cili thotë se pavarësisht përpjekjeve për izolim, përgjatë këtyre muajve, SarsCov2 nuk do të ndalet, por mund të rikthehet edhe më i fortë.
“Përhapja me këto ritme e infeksionit, pavarësisht stabilizimit të situatës në këtë fazë, rrit dyshimet se mund të rikthehet në çdo moment, në çdo hapësirë të hapur, kudo ku njerëzit po i rikthehen jetës normale. Kjo gjë nuk ka mbaruar derisa të mbarojë vërtetë. Derisa alarmi të marrë fund, ne nuk duhet të ulim nivelin e vigjilencës. Vetëm kështu mund ta frenojmë pandeminë”, tha Moon Jae-in.
Ai shtoi se do të duhet kohë derisa kjo situatë të marrë fund, teksa paralajmëroi se në vendin e tij, masat nuk do të lehtësohen krejtësisht, ndërsa task forca e shëndetësisë po përgatitet tashmë për valën e dytë të vjeshtës apo dimrit të këtij viti, duke vijuar trajnimet e të gjithë stafit spitalor për t’u përballur me këtë virus./Opinion.al
