Një situatë e paprecedentë ka ndodhur në aeroportin “Marco Polo” të Venecias. Aeroporti është mbyllur për shumicën e fluturimeve, përreth një orë gjatë së premtes, sepse një tufë pulëbardhash pushtoi pistën.
Disa avionë që parashikohej të uleshin në momentet e bllokimit, u drejtuan në aeroporte të tjera si Verona, Trieste dhe Milano.
Kur u zbulua problemi, thotë kompania e menaxhimit të aeroportit, “filluan aktivitetet e zakonshme të nevojshme për të garantuar sigurinë e plotë për pasagjerët dhe operatorët”.
Për të larguar tufën e pulëbardhave, “u përdorën të gjitha mjetet e parashikuara, duke përfshirë parandaluesit akustikë dhe një skifter të kontrolluar manualisht. “Këto janë mjete që respektojnë faunën dhe mund të garantojnë siguri në të njëjtën kohë”-thotë kompania e menaxhimit të aeroportit .
Sipas mediave italiane, aeroporti u kthye në funksionimin normal në orën 11.20.
