Qeveria e Emirateve të Bashkuara Arabe deklaroi se ka miratuar përdorimin e një vaksine kundër koronavirusit tek mjekët dhe infermierët.
Sipas tyre vendimi erdhi pas disa testimeve të suksesshme klinike, ku nuk u shfaqën efekte anësore, por u dëshmua se krijohen antitrupa.
Ministri i Shëndetësisë, Abdul Rahman Mohammed Al Oweis, tha se vaksina mund të përdoret në “raste emergjente”, duke përfshirë stafin shëndetësor të vendit. Ai saktësoi se 31,000 vullnetarë, që përfaqësonin 125 kombësi, kanë marrë pjesë në provat klinike.
Kompania Sinopharm CNG, me seli në Kinë, ka zhvilluar vaksinën dhe ka kryer fazën e tretë të provës klinike së bashku me Qeverinë në Abu Dabi dhe firmën e inteligjencës artificiale, G42 Healthcare, me bazë në Emiratet e Bashkuara Arabe.
Sakaq, Emiratet e Bashkuara Arabe kanë regjistruar mbi 80,000 raste të të infektuarve me koronavirus dhe 399 viktima, ndërsa në të gjithë botën, koronavirusi ka prekur mbi 29 milionë njerëz.
Prej tyre, mbi 925,000 kanë humbur jetën dhe afro 20 milionë janë shëruar./Opinion.al
