Fatjona Dhimitri nga lista e Partisë Demokratike në qarkun e Gjirokastrës ka vendosur të pranojë mandatin duke dorëzuar formularin e dekriminalizimit në Komisionin Qendror të Zgjedhjeve. Dhimitri do të zëvendësojë në Parlament Tritan Shehun, deputetin e vetëm të PD-së në këtë qark. Ajo renditet e shtata në listën e PD-së, megjithëse numri total i mandateve në Gjirokastër është pesë.
Fatjona Dhimitri ka lindur në vitin 1987 në Përmet. Ka përfunduar studimet në Fakultetin e Drejtësisë në Universitetin e Tiranës, ndërsa si eksperienca pune në CV-në e dorëzuar pranë Komisionit Qendror të Zgjedhjeve përmend atë të juristes dhe avokates në disa kompani private, si ato të sigurisë fizike “Global Security” apo “Breçani Security”.
Sot në Parlament u betuan tre deputetët e rinj të Partisë Demokratike Korab Lita nga lista e PD-së në Tiranë, Arlind Çaçani nga lista e Korçës dhe Halil Jakimi nga lista e Dibrës./Opinion.al
