Zbardhet ngjarja e ndodhur në Tiranë më datë 25 tetor. Një 32-vjeçar përplasi qëllimisht me mjetin e tij një tjetër makinë, ndërsa më pas u konfliktua me shoferin duke përdorur armë zjarri. Ngjarja ndodhi në Kamëz.
Burime zyrtare nga policia pohuan se në pranga ra Elis Ademi. Gjithashtu u identifikua dhe u shpall në kërkim bashkëpunëtorin dhe porositësi i kësaj ngjarjeje.
Njoftimi:
Policia arreston shtetasin Elis Ademi, 32 vjeç, si dhe identifikon e shpall në kërkim bashkëpunëtorin dhe porositësin e kësaj ngjarjeje.
Sekuestrohet në cilësinë e provës materiale dhe arma e zjarrit.
Shërbimet e Policisë të Komisariatit Nr.5, pas një pune intensive hetimore bënë arrestimin në flagrancë të shtetasit :
– Elis Ademi, 32 vjeç, banues në Tiranë.
Nga veprimet hetimore të kryera ka rezultuar se shtetasi Elis Ademi është paguar nga shtetasi S. C., për të dhunuar fizikisht shtetasin I. Xh.
Shtetasi Elis Ademi për kryerjen e kësaj porosie ditën e ngjarjes kishte marrë dhe shtetasin F. M., duke i premtuar një shumë monetare.
Policia ka shpallur në kërkim shtetasit:
– S. C., porositës i dhunimit fizik të I. Xh.
– F. M., bashkëpunëtor i shtetasit Elis Ademi.
Në vijim të veprimeve hetimore policia ka gjetur dhe sekuestruar në cilësinë e provës materiale armën e zjarrit të cilën shtetasi Elis Ademi pas ngjarjes e kishte hedhur në Qerek, në zonën e Fushë Krujës.
Materialet iu referuan Prokurorisë së Rrethit Gjyqësor Tiranë në ngarkim të shtetasit E. A., për veprat penale “Vrasja e mbetur në tentativë”, “Prodhimi dhe mbajtja pa leje e armëve luftarake dhe e municionit”, “Shkatërrimi i pronës” dhe ”Prishja e qetësisë publike”, parashikuar nga nenet 76 e 22, 25, 278/2, 150 dhe 274 të Kodit Penal.
