Edison Pula një nga personat më të rrezikshëm në vend me precedentë të shumtë, arriti tu shpëtojë policëve nga duart mbrëmjen e djeshme dhe sot ndodhet në arrati. Rreth orës 18:00 të ditës së djeshme, Edison Pula po transferohej nga stacioni policor i Fushë-Krujës drejt komisariatit të Krujës.
I shoqëruar nga efektivët e policisë dhe i prangosur, në momentin që zbriti nga furgoni, Edison Pula i shpëtoi policëve dhe kapërceu murin rrethues të institucionit. Dyshohet se 21-vjeçari ka dhunuar me grushte e sende të forta policët. Gjithsesi dy policët që e shoqëronin janë duke u marrë një pyetje nga grupi hetimor.
Policia ka ngritur postblloqe në të gjithë zonën për arrestimin e Pulës. Mësohet se 10 grupe të FNSH-ve kanë rrethuar Krujën, Fushë-Krujën si dhe akset që lidhen me Niklën. Po kështu po kryhet kontroll nëpër banesa.
Edison Pula, 21 vjeç, banues në Krujë është një nga anëtarët e grupit kriminal të Niklës. Ai u arrestua dje (e mërkurë) sëbashku me 7 persona të tjerë për atentatin ndaj Gentian Bejtjat në shtator. Edison Pula akuzohet për “Vrasje me paramendim e ngelur në tentativë”, “Shkatërrim i pronës me eksploziv”, “Vjedhje me dhunë” dhe “Prodhimi dhe mbajtja e armëve dhe municioneve luftarake”.
Në atentatin e shtatorit mbeti i plagosur ish-polici i burgjeve Gentian Bejtja. Edhe ky i fundit ka histori kriminale. Ai ishte një nga autorët e dyshuar për vjedhjen e makinës që u përdor në vrasjen e kryekomisar Dritan Lamajt. Personi tjetër që mori pjesë në atë vjedhje, Enver Stafuka rezulton i zhdukur prej 2 vitesh.
Ndërsa lidhur me grupin kriminal të Niklës, ku bënte pjesë edhe i arratisuri Edison Pula policia tha se përpos atentatit, dyshohet edhe për transport marijuanë nga Tepelena, drejt zonave të Durrësit, Krujës e Tiranës. Grupi po ashtu është i dyshuar si përgjegjës edhe për dy grabitje me armë të ndodhura në rrugën nacionale Fushë Krujë – Krujë.
Policia arrestoi dje si pjesë e këtij grupi kriminal: Edison Pulën (tani i arratisur), Edison Bamin, Arjan Ademin, Fadjol Anamalin, Muharrem Shetën, Ilir Cacën, Kaludi Ismailajn dhe Astrit Rryçin. Ndërsa arriti tu ikte policëve dhe është në kërkim Oltjon Caca. /Opinion.al
* Video, arrestimi i grupit te Nikles paraditen e djeshme (e merkure)
