27 vjet më parë Luljeta njohu Elvanën, mikeshën e saj që e ndihmoi dhe i qëndroi pranë në momentet më të vështira. Vajzat kishin një lidhje shumë të fortë me njëra-tjetrën por një ditë kontaktet mes tyre humbën. Siç rrëfeu Luljeta në “Ka Një Mesazh Për Ty” në “E Diela Shqiptare” në Tv Klan, ajo emigroi dhe krijoi familjen në Angli, shkëmbente letra me Elvanën por një ditë nisën t’i ktheheshin mbrapsht.
Numri i telefonit të prindërve të shoqes nuk punonte dhe kontaktet humbën për 27 vjet. “Ka Një Mesazh Për Ty” ka mundur të gjejë Elvanën dhe ajo e pranoi ftesën për të ardhur. Kur hapet pamja në ekran reagimi i saj ndaj Luljetës është tërësisht i natyrshëm sepse e kujton ndryshe por mjaftojnë pak detaje për ta bërë të emocionohet.
Elvana: Nuk e njoh.
Ardit Gjebrea: Ndërsa ajo tha nuk “ka ndryshuar fare, siç e kam lënë unë para 27 vitesh, ashtu është”.
Elvana: Në Angli?
Ardit Gjebrea: Në Angli.
Elvana: Me një çun të vogël?
Ardit Gjebrea: Po.
Elvana: Po, tani më ra ndërmend. E kam dhe foton e saj, ma ka dërguar.
Ardit Gjebrea: Ai çuni para pak ditësh është martuar ë, sa për dijeni. Është martuar dhe me një shqiptare.
Elvana: Urime!
Ardit Gjebrea: Po ti sa fëmijë ke?
Elvana: Unë dy goca.
Ardit Gjebrea: Dhe Luljeta… po pse duhet t’i them unë gjërat, më mirë t’i thotë vetë. Je kureshtare ta dëgjosh?
Elvana: Po.
Luljeta: O zot i madh, më ka marrë shumë malli!
Elvana: Edhe mua.
Luljeta: O Elvana, nuk e di çfarë mund të them por ti për mua ke qenë një shoqe, një motër, gjithçka e mrekullueshme që për këtë arsye kam ardhur vetëm për ty që të të përqafoj edhe një herë. Jam shumë, shumë, shumë e lumtur që ti erdhe të them të drejtën. Jam shumë e lumtur.
Elvana: Edhe unë.
Luljeta: Dhe nuk e di si mund ta shpreh sepse kam aq shumë emocione sa një Zot e di.
Me sy të përlotur dhe emocione të forta, dy mikeshat i japin njëra-tjetrës një përqafim të ngrohtë të ruajtur prej 27 vjetësh.
