Rrugëtimi i radhës në “E Diela Ndryshe” e dërgon Arbër Hajdarin dhe Ardit Gjebrean drejt Maliqit të Korçës. Këtë herë misioni ka në qendër një histori frymëzuese, i shpjegon Arbri drejtuesit të programit “E Diela Shqiptare” në Tv Klan. Një sakrificë e vërtetë që në thelb ka dëshirën më të mirë të një prindi.
Në Maliq, ata takojnë Gencin. Ai është baba i 4 fëmijëve, Sagionës, Jonit, Ancit dhe Ergit që janë të moshave 8,7, 6 dhe 3 vjeç. Përballë tyre ndodhet një ndërtesë jo më e madhe se një shtëpi ku në njërën anë ndodhet kopshti, në tjetrën shkolla dhe pak më tutje ambulanca. Genci është duke pritur 4 fëmijët.
Ardit Gjebrea: Ti me çfarë i sjell fëmijët në shkollë?
Genci: Unë i sjell me kalë.
Ardit Gjebrea: I hip të katërt në kalë?
Genci: Kur është koha me baltë, e marr edhe çupën e hipi në kalë. Kur është thatë, e marr përdore.
Ardit Gjebrea: Sa larg e ke shtëpinë nga këtu?
Genci: Mban rreth 1 orë.
Ardit Gjebrea: Ti ku banon?
Genci: Unë banoj në Këmbëthekër.
Ardit Gjebrea: Sa shtëpi ka aty?
Genci: Janë 6 familje.
Ardit Gjebrea: Sa banorë jeni në total?
Genci: Mund të bëhemi me gjithë fëmijë, nja 25.
Ardit Gjebrea: Sa fëmijë të tjerë ka përveç 4 të tuve?
Genci: Nuk ka. Vetëm fëmijët e mi janë të vegjël.
Genci tregon se ka pasur tentativa për mbylljen e shkollës, por bashkëshortja e tij ndërhyri sepse më pas shkollimi i fëmijëve do të vështirësohej edhe më.
Genci: Edhe këtë do ta kishin mbyllur ata, por nuk lejoi nusja ime.
Ardit Gjebrea: Pse, çfarë bëri?
Genci: Po iu tha që nuk ju ndjek dot, unë edhe këtu mezi i sjell.
Ardit Gjebrea: Domethënë, nëse kjo shkollë do të mbyllej, ku do të ishte shkolla tjetër?
Genci: Do t’i regjistroja në Sovjan pastaj.
Ardit Gjebrea: Dhe ti, nga Këmbëthekri deri këtu, sa bën distancë?
Genci: Bën gati 1 orë.
Ardit Gjebrea: Po nga Këmbëthekri në Sovjan?
Genci: Nga Këmbëthekri në Sovjan, i bie afro 1 orë e gjysmë.
Ardit Gjebrea: Pra do të të shtohej edhe gjysmë ore. Ti ke makinë?
Genci: Jo. As kam, as nuk e kam mësuar.
Ardit Gjebrea: Pse?
Genci: Duhet të bësh kursin, ka punë ajo.
Ardit Gjebrea: Po bëje kursin, kush të pengon?
Genci: Kemi pasur kalamajtë e vegjël.
Vetë Genci nuk ka mundur të kryejë as ciklin 9-vjeçar. Kushtet e vështira e lejuan ta frekuentonte shkollën deri në klasën e katërt, më pas e ndërpreu. Sot është një nga pengjet e tij më të mëdha ndaj edhe sakrifikon që fëmijët të kenë një të ardhme më të mirë.
Genci: Mendoj se i bie që po të shkosh në punë, po s’pate shkollë, tjetri s’të merr. Edhe punëtor krahu të jesh, s’të merr ai.
Ardit Gjebrea: Ky është motivi pse ti sakrifikon që i sjell vetë fëmijët në shkollë?
Genci: Po.
Ardit Gjebrea: Në çfarë ore ngriheni ju në mëngjes?
Genci: Unë ngrihem në orën 5, ndez zjarrin, pastaj iu bëj tost fëmijëve me sallam e djathë, pastaj në orën 6 e gjysmë ngre fëmijët.
Ardit Gjebrea: E duan shkollën?
Genci: Ata kanë qejf, edhe kur është e diel, ata s’e dinë, do të shkojmë në shkollë thonë./tvklan.al
