Kryeministri i Serbisë, Aleksandër Vuçiç ka thënë se qeveria e re serbe do të përfshijë edhe një pjesëtar të komunitetit LGBT, që përbënë edhe rastin e parë të tillë në shtetin ballkanik.
Aleksander Vuçiç, qeveria e re e të cilit pritet të zyrtarizohet brenda javës, ka thënë sot se ministrja e re e Administratës Publike do të jetë 40 vjeçarja, Ana Bërnabiç e cila hapur e ka konfirmuar orientimin e saj seksual si lesbike.
Vuçiç ka thënë se ai e ka parasysh që vendimi i tij mund të zgjojë reagime në Serbi, vendi ku pjesëtarët e komunitetit LGBT shpesh përballen me kërcënime dhe sulme.
“Zgjedhjet e saj personale nuk më interesojnë. Ajo është e mirëpritur në qeverinë e Serbisë”, iu ka thënë Vuçiç gazetarëve, kur është pyetur rreth orientimit seksual.
Qeveria e qendrës së djathtë e Vuçiç pritet që formalisht të votohet në fund të javës, mbi 3 muaj prej mbajtjes së zgjedhjeve të parakohshme parlamentare të mbajtura më 24 prill. /klan
