Detaje të reja janë zbardhur për operacionin antidrogë të shtrirë në disa qytete të vendit, për të cilin u vunë në pranga 233 persona, ndërsa 82 të tjerë u shpallën në kërkim.
Gjatë këtij operacioni u zbulua edhe fakti se në vendin tonë qarkullonte një lloj droge e re, ekzistenca e së cilës nuk dihej deri më sot. Bëhet fjalë për kanabis në formë xhelatine, që vinte nga Kanadaja nëpërmjet postës.
Sipas KlanNews, mësohet nga burime se ky lloj kanabisi është shumë më i fortë se ai që kultivohet në vend, e po ashtu edhe shumë më i shtrenjtë.
“Droga e ardhur nga Kanadaja është shumë më e fortë se kanabisi që kultivohet brenda vendit, me 5 apo 6 fish më shumë efekt, si pasojë edhe me e shtrenjtë. Një kuti si ato të konservave, kushton 50 euro, ndërsa të tjerat shkojnë deri në shifra 300 euro. Seksioni Kundër Narkotikëve në Policinë e Tiranës sekuestroi edhe 3.7 kg kokainë gjatë operacionit të sotëm dhe 10 kg kanabis. Ndërkohë, mësohet se janë sekuestruar edhe 30.000 euro, 45 milionë lekë të vjetra, 6000 paund, 12 automjete, 3 motomjete, 78 aparate celularë dhe 12 peshore elektronike”, njoftohet në media.
22 prej personave të arrestuar në Tiranë u kapën në zonën e Kombinatit.
Mësohet se në pranga ka përfunduar edhe një menaxher i një lokali në ish-Bllok, pasi në ambientet e tij shpërndahej droga.
