Ky është Shkëlqim Muço. Është nga të paktet hekurkthyes në Gjirokastër. Nuk e ka trashëguar këtë zanat, por e ka mësuar që në 1977.
Në fillim të viteve ‘90 hapi këtë punishte në qytetin e gurtë. Aty punojnë disa persona përfshire edhe të birin të cilit ia ka trashëguar profesionin.
Sipas tij të realizosh punime me hekur nuk është e vështirë, por duhet vullnet dhe pasion për ta bërë.
Nuk realizojnë punime me hekur vetëm në Gjirokastër, por edhe në qytetet përreth. Vitet e fundit kërkesat janë shtuar për shkak edhe të zhvillimit të turizmit. Ata që kanë hotele apo hapin rishtazi bujtina kërkojnë punime të veçanta.
Të rinjtë nuk i sheh të lidhur me këtë profesion ndaj Shkëlqimi bën thirrje që grupmosha e re të edukohet me të tilla zanate në mënyrë që ato mos të zhduken./ Klan News
