Një shtetas izraelit i dyshimtë ka qendruar në Shqipëri me pajisje përgjuese. Ai është ndaluar pasditen e të enjtes në Rinas teksa dilte nga vendi ynë. Lajmi është mësuar nga Lapsi.al.
Ky portal raporton se “gjatë kontrolleve rutinë të valixheve të udhëtarëve, është hasur një person me shtetësi të huaj i cili lëvizte me një valixhe të zezë, që krijoi dyshime. Kur u pyet çfarë kishte brenda, ai deklaroi se transportonte një pajisje përgjuese. Burri, rreth të pesëdhjetave i tha punonjësve të sigurisë se ishte një shtetas izraelit. Fillimisht punonjësit e sigurisë kanë mbetur të shokuar, por më pas i kanë kërkuar të veçohet nga udhëtarët e tjerë. Menjëherë kanë lajmëruar eprorët e tyre. Shtetasi izraelit është izoluar dhe është marrë në pyetje nga oficerët e policisë”.
“Gjatë marrjes në pyetje ka qenë i pranishëm edhe shefi i Komisariatit të Rinasit, Ermal Milori”, shkruan më tej Lapsi.
Nuk ka asnjë njoftim zyrtar për ngjarjen. Opinion.al u interesua pranë Policisë së Shtetit dhe ajo tha se “nuk kemi ndaluar apo shoqëruar asnjë shtetas izraelit”. Më tej zëdhënësi shtoi se “verifikimet në aeroport janë punë rutinë e policisë”.
Rreth një vit më parë ne vend shpërtheu skandali i një pajisje përgjuese IMSI CATCHER që dyshohet se u fut në Shqipëri nga Interforca italiane në bashkëpunim me Policinë e Shtetit dhe pa lejen e Prokurorisë. Hetimet për këtë çështje përfshinë ish-ministrin Tahiri dhe drejtorin e Policisë, Haki Çako pas dyshimeve se mund të jenë përgjuar edhe politikanë. /Opinion.al
