Në Tetor transmetuam rastin e Qamil Banit, një qytetar nga Dimali, i cili kishte qenë pompist në ndërmarrjen e ujësjellësit të Dimalit prej 8 vjetësh.
Me profesion Bani është elektro pompsit dhe e quanin “skrepi i Dimalit”. Në Maj 2023 Qamili mbushi moshën e pensionin, por e lanë sërish me kontratë 6 mujore.
Por pas një muaji e hoqën, duke e zëvendësuar me një person tjetër. Vetë përgjegjësi, Petref Sula ka tre vite që ka mbushur moshën e pensionit, por thotë se e mban partia.
Sula, përgjegjësi i Ujësjellësit Dimal, e përdor makinën e institucionit për transport pulash, biznes me të cilin, merret e shoqja.
Kur u ballafaqua me videon, drejtori u detyrua ta pranojë përdorimin e makinës, duke thënë, se ka rastisur.
Pas transmetimit, Qamil Bani thotë se shkoi e bëri kërkesë në drejtorinë e Beratit, ku i thanë, se po e shohin me prioritet rastin e tij, për ta kthyer në punë.
“Më tha do ta shikojmë rastin tënd zoti Qamil. Sa të hapet rasti i parë do të marrim në punë. Dhe kështu shpresoj dhe jam në pritje tani”, tha Bani.
Përsa i përket përgjegjësit të ujësjellësit, që transportonte pula me makinën e punës, komisioni i disiplinës vendosi lirimin nga detyra të zotit Petref Sula.
“Menjëherë sapo morëm njoftimin nga ju mblodhëm Komisionin e Disiplinës, i cili doli në një përfundim dhe u mor vendimi për lirimin e zotit Petref Sula nga detyra që në datë 26/10 me motivacionin për përdorimin e mjeteve të ndërmarrjes për nevoja personale. Është bërë dorëzimi i detyrës nga një komision i posaçëm dhe sot ky vend është vakant. Petrifi ka qenë në punë megjithëse ka dalë në pension. Arsyeja pse e kemi mbajtur në punë ka qenë sepse e kemi emëruar si likujdator të shoqërisë së vjetër. Kemi bërë veprimet noteriale. Pasi janë bërë këto veprime dilte mundësia që zoti Petref Sulaj të largohej nga detyra”.
