Arrestimi i 12 personave ditën e enjte në Shkodër, të cilët akuzohen për dhënie fajdesh në mënyrë të paligjshme, ka nxjerrë edhe një herë në dukje problemin që ka ekonomia shqiptare.
Banka e Shqipërisë thotë se 17% e borxheve që kanë familjet shqiptare, janë marrë nga burime informale. Në vrojtimin e saj, Banka e Shqipërisë ka pyetur një kampion prej 1,200 familjesh në gjithë vendin. Sipas rezultateve, një e treta e familjeve shqiptare kanë një borxh për të shlyer, duke përfshirë edhe kreditë, ndërsa 17% e tyre i kanë marrë borxhet në rrugë informale.
Sipas disa vlerësimeve, borxhi që shqiptarët kanë në rrugë informale kap shifrën e 250 milionë eurove, megjithëse shuma mund të jetë edhe më e lartë.
Fajdet e paligjshme dhe me interesa të larta janë një problem për ekonominë dhe sigurinë shqiptare, pasi shpesh herë rastet përfundojnë në rrënim ekonomik, konflikte fizike dhe hakmarrje./Opinion.al
