Marina e Shteteve të Bashkuara thotë se dron luftarak Iranian, dje është afruar në distancë 30 metra një aeroplani luftarak amerikan, teksa ai po ulej në një aeroplanmbajtëse në Gjirin Persik.
Zëdhënësi i Komandës Qendrore të Forcave të Marinës së Shteteve të Bashkuara, Bill Urban, tha se ky afrim ka ndodhur në hapësirën ajrore ndërkombëtare, teksa bombarduesi amerikan i tipit, U.S. F/A-18E Super Hornet, përgatitej të ulej në aeroplanmbajtësin USS Nimitz.
Zoti Urban theksoi se ky incident i rrezikshëm “nuk është në harmoni me të drejtën dhe sjelljet ndërkombëtare detare”.
Sipas tij, kjo ishte ndërhyrja e 13-të “e pasigurt dhe joprofesionale” ndërmjet forcave detare amerikane dhe iraniane gjatë këtij viti.
Urban theksoi se bombarduesi amerikan është dashur të ndërmarrë “aksion evitues” për tu larguar nga droni iranian.
Në muajin korrik, një luftanije patrulluese amerikane ka lëshuar të shtëna alarmuese kundër një anijeje të Gardës Revolucionare të Iranit në Gjirin Persik, kur ajo i afrohej luftanijes amerikane.
