31 Maji është vendosur si afati i fundit për të përmbyllur Reformën Zgjedhore. Siç tha edhe ambasadorja e SHBA, Yuri Kim ky nuk është një afat i vendosur nga ndërkombëtarët por është një premtim që partitë politike i kanë bërë shqiptarëve dhe që duhet mbajtur.
Por a do t’i lënë palët politike mënjanë ndasitë dhe të gjejnë një konsensus për të përmbushur premtimin?
Pas dy ditësh me dakordësi mbi disa çështje, negociatat mes palëve ranë dje përsëri në pikën 0 pasi nuk u arrit konsensus për asgjë. Çështjet më të nxehta që ndajnë opozitën e bashkuar me mazhorancën janë administrata zgjedhore, kolegji zgjedhor dhe identifikimi biometrik.
Partia Socialiste kërkon depolitizim të plotë të admininstratës zgjedhore por opozita nuk ka besim tek procesi dhe shpreh sheqetësimin e saj se kryeministri Rama do ta përdorë këtë si justifikim për të vendosur militantë për të kontrolluar procesin.
Sa i përket Kolegjit Zgjedhor, opozita kërkon që rolin e tij si organ shqyrtues i ankimimit të palëve ta marrë Gjykata Kushtetuese. Në njëfarë mënyrë opozita po kërkon kështu edhe vënien në funksion sa më shpejtë të kësaj Gjykate pas 2 vitesh tashmë jashtë funksionit. PS nuk është shprehur konkretisht për këtë pikë por ka theksuar se anëtarët e Kolegjit Zgjedhor duhet të kenë kaluar të gjithë vetigun. Kujtojmë se Gjykata Kushtetuese ka një sërë çështjesh me interes për të shqyrtuar pasi të vihet në funskion, ndër to edhe ligjshmëria e zgjedhjeve lokale të 30 qershorit.
Opozita e bashkuar ka deklaruar se qeveria tranzitore është kusht i padiskutueshëm dhe këmbëngul gjithashtu që identifikimin biometrik në zgjedhje të jetën në të gjithë vendin si e vetmja garanci, që sipas saj do të pengojë mbushjen e kutive të votimit. Por shumica socialiste thotë për këtë nuk ka kohë dhe garanci nga teknologjia dhe pranon kushtin të pjesshëm, pra që identifikimi biometrik të jetë vetëm në zona të caktuara.
Opozita parlamentare e përfaqësuar nga Rudina Hajdari ka si kusht të sajin ndryshimin e sistemit zgjedhor. Kjo pikë është futur sipas saj në axhendën e diskutimeve duke shqyrtuar sistemin danez. Mazhoranca është shprehur se kjo do të kërkojë më shumë kohë dhe duhet të presë për një moment tjetër.
Deri tani palët kanë arritur të gjejnë konsensus për 5 pika që lidhen me financimin e partive duke rritur financimin nga ana e shtetit dhe ulur ndjeshëm financimin nga privati, kuotën gjinore në zgjedhje ku 1 në 3 emra në lista do të jetë një grua, ndryshimi i periudhës zgjedhore, sistemin e monitorimit të kamerave dhe praninë e policisë në zgjedhje jashtë çdo qendre votimi dhe numërimi. /Opinion.al
