Pas një mbledhjeje të gjatë mbrëmjen e 21 marsit, Këshilli i Europës, organi që mbledh krerët e qeverive të shteteve anëtare të Bashkimit Europian, i ka dhënë mundësinë Britanisë që të shtyjë datën e daljes nga unioni, e cila fillimisht ishte 29 marsi.
Afati i ri është 22 maji, por do të jetë i kushtëzuar nga aprovimi i marrëveshjes së Brexit nga Parlamenti i Britanisë, i cili në dy muajt e fundit ka refuzuar dy marrëveshje.
Sipas asaj që ka komunikuar Presidenti i KE-së, Donald Tusk, këtë marrëveshje parlamenti duhet ta miratojë brenda javës tjetër. Nëse kjo gjë nuk ndodh, Britania do të ketë kohë deri në 12 prill për të treguar se çfarë ka ndër mend të bëjë.
Nëse as kjo marrëveshje nuk miratohet nga parlamenti britanik, atëherë qeveria e Theresa May-t ose do të dalë nga Bashkimi Europian pa një marrëveshje, ose me shumë mundësi do të organizohen zgjedhje politike të parakohshme apo një referendum i dytë./Opinion.al
