Një çift bashkëshortesh në fshatin Dvoran të Korçës ditën e hënë janë grabitur dhe dhunuar nga persona të paidentifikuar.
Policia thotë se autorët pasi i dhunuan, u morën 50 mijë lekë të reja, 70 Euro dhe 150 Dollarë. Më pas u larguan në drejtim të paditur.
Ngjarja ndodhi rreth orës 19:15 në biznesin privat të çiftit.
Dy bashkëshortët i kanë deklaruar policisë se grabitësit kanë qenë të armatosur.
Grupi hetimor ka nisur punën për të zbardhur ngjarjen dhe për të identifikuar e arrestuar autorët.
Njoftimi i Policisë së Korçës:
Më datë 04.12.2017, rreth orës 19:15, jemi njoftuar se në fshatin Dvoran, në ambjentet e një firme private pijesh kanë shkuar persona të armatosur dhe të maskuar.
Nga të dhënat e para dyshohet se këta persona pasi kanë lidhur pronarin dhe bashkëshorten e tij, kanë vjedhur një sasi lekësh prej 50 mijë lek të reja, 70 Euro dhe 150 Dollarë. Më pas këta persona janë larguar me shpejtësi në këmbë.
Në vendngjarje, ndodhen forca të shumta policie. Janë ngritur pika kontrolli për të bërë të mundur identifikimin e kapjen e autorëve.
Nga ana e Policisë po punohet për sqarimin e rrethanave të ngjarjes, si edhe dokumentimin e plotë të saj.
