Është inauguruar sot një çerdhe shtetërore tek Komuna e Parisit që zbut disi problemin e banorëve të lagjeve të reja të Tiranës që nuk kanë ku ti lënë fëmijët. Duhet të kemi parasysh faktin se lagjet e reja si Komuna e Parisit, Kodra e Diellit, Fresku, Unaza e Re kanë mungesa të mëdha për sa i përket shërbimeve që ofron shteti.
Siç duket edhe nga materialet filmike që dërgon Bashkia e Tiranës, tek “Komuna e Parisit” është bërë një investim i mirë për fëmijët e vegjël. Çerdhja është projektuar nga Bashkia dhe financuar nga ‘Dental Turk’.
Kryebashkiaku Veliaj tha se e njoh kërkesën e madhe që ka qyteti për kopshte e çerdhe shtetërore dhe për këtë po shihet mundësia e marrjet së disa objekteve me qira. “Kemi filluar të shohim në qytet nëse mund të marrim direkt me qira godina që tashmë janë të përshtatura si shtëpi të mëdha për t’u transformuar pastaj në çerdhe 2 ose 3-katëshe. Do të vazhdojmë një proces kërkimi në të gjithë qytetin për të kuptuar zonat ku kemi kërkesën më të lartë për ndërtesa të ngjashme që me pak punë mund të konvertohen në çerdhe ose kopshte”, deklaroi Veliaj.
Ndërsa ministri Pandeli Majko njëherësh deputet i zonës tha se “çerdhja është një ngjarje, mbi të gjitha, familjare. Ky është një komunitet, i cili e ka pasur shumë të nevojshme, pasi një pjesë e madhe e prindërve këtu janë në punë dhe imagjinoni se çfarë problemesh krijon mbajtja e një fëmije në moshë të vogël”.
I pranishëm në inaugurimin e kësaj shtëpize për fëmijë ishte edhe artisti dhe publicisti i njohur, Bujar Kapexhiu, i cili vlerësoi punën që po bën çdo ditë Bashkia e Tiranës në transformimin e Tiranës. “Ju nuk thatë një gjë që është e vërtetë: ju thatë që nuk kam shkopin magjik, por në të vërtetë zgjedhësit e Tiranës e kanë gjetur ‘shkopin magjik’, ai është në formën e kryetarit që po zgjidh këto probleme”, tha Kapexhiu.
