Nëse deputetët britanikë refuzojnë marrëveshjen që kryeministria britanike, Theresa May do t’u propozojë muajin e ardhshëm, ajo u ka premtuar një votim për përjashtimin e Brexitit pa marrëveshje, apo shtyrjen e daljes së Britanisë së Madhe nga blloku.
May foli para deputetëve në mesin e kërcënimeve për një revoltë nga ministrat e kabinetit të saj. Kryeministrja tha se ajo do ta vendoste marrëveshjen e saj të tërheqjes, përshirë ndryshimet për të cilat ajo ka rënë dakord me Bashkimin Evropian, para një votimi më 12 mars.
Nëse do të dështonte, deputetëve do t’u ofroheshin dy votime të ndara, një ditë më pas. I pari për një Brexit pa marrëveshje dhe i dyti, për ta shtyrë daljen nga BE përtej 29 marsit.
“Më lejoni të jem e qartë. Nuk dua shtyrjen e nenit 50. Fokusi ynë absolut duhet të jetë puna për arritjen e një marrëveshje dhe largimi nga blloku në datën 29 mars,” – u tha kryeministrja deputetëve.
Kryeministrja gjithashtu, tha se angazhimet e saj të reja, ishin përgjigje të atyre deputetëve që janë të shqetësuar se po u mbaron koha. Ditët e fundit, gjashtë ministra kanë kërcënuar të dorëhiqen, nëse May nuk merr masat e duhura që parandalojnë daljen nga BE-ja pa një marrëveshje./E.M
