Në një kohë kur tregu i banesave ka vite që është në një “krizë shitjesh” nga qeveria vijnë nisma të cilat pretendohet se do ndikojnë pozitivisht.
Nisma për rivlerësimin e pasurive do të bëjë që mjaft apartamente të jenë tashmë të vlerësueshmë më vlerën e tregut. Udhëzimi i përbashkët i Ministrisë së Drejtësisë dhe asaj të Financave, tashmë i botuar në fletoren zyrtare, mund ta bëjë të zbatueshme këtë nismë sipas afateve ligjore.
Sipas kësaj nisme, të gjithë individët që kanë në pronësi pasuri të paluajtshme dhe i kanë të regjistruara, brenda datës 28 shkurt 2017, u jepet e drejta të bëjnë rivlerësimin e tyre me vlerën e tregut.
Në këto pasuri përfshihet toka dhe ndërtesa, dhe e drejta e rivlerësimit u jepet edhe atyre që e kanë bërë më herët një gjë të tillë. Kjo nismë edhe pse është ndërmarrë edhe më parë nga qeveria e kaluar, nuk pati ndonjë efekt as tek qytetarët, por as tek të ardhurat në buxhetin e shtetit.
Kështu e komenton deputetja e PD, Jorida Tabaku në një prononcim për TV SCAN. Por një nismë tjetër e qeverisë për këtë sektor, siç është ajo e sigurimit të detyrueshëm të apartamenteve, është kundërshtuar fort nga opozita.
Qeveria ka ndërmarrë një nismë për vendosjen e sigurimit të detyrueshëm për banesat dhe bizneset në rast të fatkeqësive natyrore. Ky plan është sugjeruar më parë nga Banka Botërore./SCAN TV
