Një letër e hapur e 40 organizatave ndërkombëtare që kërkonin heqjen e Shqipërisë nga lista e vendeve të sigurta ka shkaktuar reagim, duke vënë përballë në një debat televiziv, Daniel Nikollën pjesë e kësaj nisme në Britaninë e Madhe dhe sipërmarrësin Dritan Gremi në Tiranë.
Të ftuar në Euronews Albania, Nikolla shprehej se kjo nismë do të ndihmonte azilkërkuesit shqiptarë e veçanërisht në moshë të mitur, ndërkohë që për Gremin kjo nismë çonte në dëmtim të imazhit të Shqipërisë dhe me një kosto shumë të lartë.
“Nuk mund ta kuptoj si mund të jesh shqiptar i suksesshëm në momentin që firmos një letër të tillë, e cila shkon dhe njollos vendin tënd. Dokumenti në fjalë damkos Shqipërinë si një vend jo si sigurt. Arsyet që pashë dhe lexova ishin nga më të ndryshmet, por më kryesorja është që këto arsye janë të pavërteta. Shqipëria nuk është një vend i sigurt, është e pavërtetë. Kur ju ka ndodhur që keni ardhur në këtë qytet dhe jeni ndjerë i pasigurt, i terrorizuar, i grabitur, i rrahur?
Asnjë investitor nuk shkn në një vend që nuk është i sgiurt. Asnjë turist nuk vjen për të bërë pushime. Unë jam nga ata njerëz që kam vendosur të kthehem në këtë vend dhe të luftoj në këtë vend. Dhe ka 15 vite që rrugëtimin e Shqipërisë e shikoj hap pas hapi. Dhe mundin, djersën, sakrificat për të ngritur edhe imazhin e këtij vendi, nuk mundet që disa njerëz të papërgjegjshëm ta hedhin dëm. Kohët kur me imazhin e Shqipërisë luanin, shkruanin duke e çuar në nivele nga më të ulëta që kanë ndikuar për keq si në investimet e huaja dhe në turizëm duhet të mbarojnë një herë e mire”, u shpre Gremi, i cili shkoi më tej dhe tha se po përgatit një padi ligjore për të 40 organizatat.
“Askush nuk duhet të flasë për imazhin e këtij vendi. Imazhi është i shenjtë. Dhe nëse duam të jemi pak atdhetarë jashtë kufijve të këtij vendi, kujdes çfarë themi, kujdes ku e themi. Unë jam duke përgatitur bashkë me studion time ligjore një padi civile për të 40 shoqatat që kanë nënshkruar këtë dokument dhe ftoj shtetin shqiptar t’i bashkohet kësaj nisme në mënyrë që paçavure të tilla të mos ndodhin dhe të mos ketë askush kurajo të denigrojë imazhin e këtij vendi”, u shpreh biznesmeni.
I pyetur nëse kjo padi do të ngrihet në Shqipëri apo në Britaninë e Madhe, ai tha: “Jam në një situatë që po këshillohem me një mikun tim që më mbështet në të gjitha nismat e mia ligjore që të shohim se ku do ta kemi këtë padi. Ne do takohemi në gjyq. Unë jam shumë i sigurt për atë që them. Nëse keni fakte për ta mbështetur padinë, mund t’i sillni”./Opinion.al
