Një fenomen i pazakontë po ndodh me nisjen e vitit të ri 2016 në Shqipëri, ku katër vajza dhe një djalë janë larguar nga banesat e tyre dhe janë deklaruar të zhdukur nga prindërit.
Këto largime nga banesat kanë ndodhur në harkun kohor të 24 orëve, ndërsa një vajzë e cila rezultonte e zhdukur që prej vitit 2014 është gjendur ditën e djeshme nga policia.
Kështu, një adoleshente 15-vjeçare është larguar pas natës së Vitit të Ri nga banesa e saj në Tiranë.
Denoncimi ka ardhur nga babai i saj, D.K. 46 vjeç banues në Tiranë.
Ai ka thënë para policisë, se vajza e tij e mitur, 15vjeçarja XH.K. është larguar nga shtëpia dhe nuk është kthyer më. Policia ka nisur kërkimet për gjetjen e saj.
Po kështu, një tjetër denoncim ka ardhur nga Durrësi, ku një baba ka denoncuar largimin nga banesa të vajzës së tij 21-vjeçare. Babai, i identifikuar me inicialet B.B. banues në Sukth, ka thënë në polici se vajza është larguar që me datë 3 janar nga shtëpia dhe nuk është kthyer më.
Po në Durrës, një baba tjetër ka denoncuar largimin nga banesa të djalit të tij 13vjeçar më datë 4 janar të këtij viti.
Në Kukës, dy vajza janë larguar nga banesat e tyre dhe nuk janë
kthyer më. Babai 60vjeçar, A.M. ka denoncuar se i është larguar nga banesa vajza 24vjeçare H.T. e cila është banuese në Kamëz, por kishte shkuar të festonte Vitin e Ri në Kukës te familjarët.
Gjithashtu, shtetasi M.A 61vjeçar, ka denoncuar se i është larguar vajza nga banesa, e identifikuar me inicialet L.A. 29-vjeçare, e cila nuk është kthyer më.
Po kështu, Policia e Gjirokastrës ka njoftuar se ka gjetur një 20-vjeçare me inicialet A.K. banuese në Berat, e cila rezultonte se ishte larguar nga banesa që në vitin 2014. (Panorama.com)
