Bota

Nisja e raketës nga NASA dhe SpaceX, Trump: Nuk do të jemi numri dy askund


Bëhu pjesë e Grupit Zyrtar të Opinion.al
>> KËTU <<
               Publikuar në : 08:53 - 31/05/20 |
Opi Nion

Nisja drejt Stacionit Ndërkombëtar të Hapësirës e dy astronautëve të NASA-s në bordin e raketës Falcon 9, u bë realitet të shtunën pasdite, pas një prove të dytë.

Raketa e kompanisë private SpaceX, në pronësi të miliarderit Elon Musk, u lëshua nga Qendra e Hapësirës Kennedy në Florida dhe udhëtimi deri në Stacionin Ndërkombëtar të Hapësirës zgjat 19-orë.

Ndërkohë, presidenti amerikan, Donald Trump ka përgëzuar Elon Musk, pasi sipas tij, ka përmbushur prej dekadash. Trump ka thënë se partneriteti midis NASA dhe SpaceX i ka dhënë Amerikës “një fuqi të pakrahasueshme”.

“Tani e tutje SHBA do të përdorë aftësitë në rritje të shpejtë të sektorit tonë komercial. Ne do të përdorim raketa dhe anije kozmike të projektuara, të ndërtuara, në pronësi dhe të nisura nga kompani private amerikane me një çmim fiks për taksapaguesit amerikan. Nisja e sotme e raketës e bën të qartë se industria komerciale e hapësirës është e ardhmja”,- ka thënë Trump.

Trump ka shtuar se kur ai filloi detyrën si president, NASA kishte “humbur rrugën”.

“Ju nuk mund të jeni numri një në Tokë nëse jeni numri dy në Hapësirë. Dhe ne nuk do të jemi numri dy askund”,- tha Trump.

SpaceX dhe NASA tanimë kanë bërë realitet atë që po vlerësohet si një fillim historik. Bëhet fjalë për dërgimin e dy astronautëve të NASA-s në Stacionin Ndërkombëtar Hapësinor (ISS).

Dhe tanimë Douglas Hurley dhe Bob Behnken kanë “shpërthyer” nga SpaceX Falcon 9, duke u nisur nga Kennedy Space Center në Florida.

Nëse fluturimi do të jetë i suksesshëm, ai do të shënojë një moment thelbësor në eksplorimin e hapësirës me operimin e parë të një kompanie private.

Presidenti amerikan Donald Trump është duke u përpjekur të riafirmojë sundimin amerikan të hapësirës dhe ka urdhëruar një rikthim në Hënë në vitin 2024./ Opinion.al

Pas