Që nga ora 8 e mëngjesit të kësaj të mërkure deri në 17 korrik do të ketë kufizim të qarkullimit në autostradën Tiranë-Durrës, për shkak të disa punimeve që do të bëhen në këtë aks.
ARRSH dhe Policia Rrugore thonë se rehabilitimi do të jetë në sistemin e ndriçimit në Autostradën Tiranë-Durrës, nga ish Dogana deri në Qafë Kashar-Vorë.
Qarkullimi i mjeteve në pjesën ku do të kryhen punimet do të jetë me shpejtësi të reduktuar, lëvizja e mjeteve do të drejtohet në 1 korsi.
“Punonjësit e Autoritetit Rrugor Shqiptar, Policisë së Qarkullimit Rrugor dhe kompanisë së mirëmbajtjes do të jenë në terren për mbarëvajtjen e ndërhyrjes dhe orientimin e trafikut sipas planit të menaxhimit të miratuar”, njofton ARRSH, ndërsa duket se ky institucion nuk e ka menduar mirë këtë ndërhyrje pas me fillimin e sezonit, autostrada Tiranë-Durrës është tejet e ngarkuar me trafik.
Mjafton të kujtojmë fundjavat kur pjesa më e madhe e kryeqytetit dyndet për në bregdet dhe trafiku në autostradë është i mbi ngarkuar. / Opinion.al
