TIRANË- Duke iu referuar akuzave të Kryeministrit se ka mbrojtur një kriminel si ish-shefi i Antidrogës së Fierit, Dritan Zagani, Presidenti u përgjigj se është anormale që në një shtet demokratik Kryeministri të cilësojë si kriminel një person të padënuar nga drejtësia. Nishani u shpreh se Dritan Zagani duhet të ishte sot një dëshmitar i mbrojtur i drejtësisë.
“Zagania nuk është heroi im. Heroi im është Ibrahim Basha. Zagani në gjykimin tim duhet të jetë dëshmitar i mbrojtur i drejtësisë. Ai duhet hetuar por jo duke u quajtur kriminel nga Kryeministri i vendit. Unë dyshoj nëse do ketë një prokuror kurajoz që ta hetojë atë pas akuzave që i ka bërë Rama”. Kështu i shpreh Bujar Nishani, në studion e ‘Opinion’.
Po në lidhje me drogën, por duke folur për avionët që u kapën rishtazi, Nishani tha se kam vlerësuar punën e policisë së shtetit në aksionet antikanabis, por e vërteta është se harta e drogës është zgjeruar shumë.
Nishani foli edhe për çështje të tjera të rëndësishme gjatë intervistës së të mërkurës në emisionin ‘Opinion’. Kështu i pyetur nga Fevziu për Tom Doshin ai tha se “nuk më është ofruar asnjë informacion për kërcënimin me vrasje të tij”. Për një tjetër çështje të nxehtë ku u përfshi Qeveria, shembjen e Kishës së Himarës, Nishani tha se “ e shoh të pajustifikueshme ndërhyrjen e shtetit grek, por edhe Qeveria shqiptare ndërhyri në mënyrë brutale për shembjen e kishës dhe mungesën e komunikimit me ortodoksët”.
Kreu i shtetit deklaroi se ruan marrëdhënie institucionale me Kryeministrin, zyra e të cilit e ka trajtuar gjithmonë si armik, qysh ditën që ka marrë detyrën e Presidentit. Ai foli edhe për çështje të tjera, si reforma në drejtësi, emigracioni, etj.
