Presidenti Nishani ka argumentuar aryset se pse ka pranuar kërkesën e Metës për të mbledhur këshillin e Sigurisë Kombëtare, por nuk bëri të ditur datën e mbledhjes. Në një deklaratë për mediat, ky institucion deklaroi se “Kjo kërkesë vlerësohet serioze, pasi ajo paraqitet nga Kryetari i Kuvendit të Shqipërisë, si dhe për shkak të problematikave që parashtrohen, të cilat kanë të bëjnë me:
1.Rrezikshmërinë e lartë shoqërore të shtetasit Klement Balili, përcjellë nga organet kompetente shqiptare apo ndërkombëtare.
2.Shqetësimin e partnerëve tanë të SHBA dhe të tjerë ndërkombëtarë, të cilët paraqesin rezerva në drejtim të punës së organeve tona përgjegjëse për shkak të mosndalimit të tij në kohë dhe zbatimit të detyrimeve të përcaktuara në akte ndërkombëtare dhe legjislacioni vendas.
3. Si dhe rrezikut që ekziston, tashmë, nga mosveprimi i agjencive ligjzbatuese të vendit tonë, në drejtim të goditjes ndaj krimit të organizuar, trafiqeve të paligjshme apo dhe bazave të tyre që mund të kontrollohen nga njerëz të politikës dhe shtetit”.
Nishani thotë se ka vendosur të thërrasë Këshillin me qëllim dëgjimin e të gjitha argumenteve të parashtruara në kërkesë nga Meta, si dhe duke i analizuar dhe duke këshilluar me të gjithë anëtarët e Këshillit.
