Te Fundit

Nishani fshikullon Komisionin e Reformës në Drejtësi


Bëhu pjesë e Grupit Zyrtar të Opinion.al
>> KËTU <<
               Publikuar në : 12:47 - 14/10/15 |
b.f

TIRANË- Presidenti Bujar Nishani ka folur me nota të ashpra në një letër që i ka dërguar Komisionit të Reformës në Drejtësi që drejtohet nga Fatmir Xhafa.

Ai deklaron se Institucioni i Presidëncës është shmangur qëllimisht nga reforma në drejtësi, por janë shpërfillur edhe rekomandimet e Komisionit të Venecias. Sipas Nishanit, Shqipëria rrezikon të hapë negociatat me BE vetëm prej dështimit në hartimin dhe miratimin e këtij drafti strategjik për drejtësinë.

“Ky komision duhet të kishte zhvilluar tryeza pune gjithëpërfshirëse me institucionet e sistemit të drejtësisë në bashkëpunim me Ministrinë e Drejtësisë dhe nën kujdesin e Presidentit”, shkruhet në letër.

“Asnjë nga tryezat e organizuara deri më sot nuk janë organizuar nën kujdesin e Presidentit të Republikës, duke reflektuar mungesën e plotë e të njëanshme të bashkëpunimit me këtë institucion. Presidenti i Republikës është ftuar të marrë pjesë në disa aktivitete selektive, me njoftim të momentit të fundit, duke pamundësuar kontributin mbi thelbin dhe përmbajtjen e çështjeve të diskutuara”, shkruhet më tej në letrën e Nishanit për komisionin e reformës në drejtësi.

“Institucioni i Presidentit të Republikës nuk është ftuar të ketë përfaqësues në Grupin e Ekspertëve të Nivelit të Lartë, pavarësisht proces-verbalit të mbledhjes së Komisionit të Posaçëm. Në asnjë rast nuk janë realizuar intervista apo takime me Institucionin e Presidentit lidhur me hartimin e raportit analitik për Reformën në Drejtësi”, vijon letra e Nishanit.

Presidenti vën në dukje se është shmangur në mënyrë të qëllimtë dhe paralajmëron se kjo taktikë po dëmton rëndë procesin. “Kompromentimi i këtij procesi arrin deri në kufijtë e mashtrimit publik mbi veprimet apo mosveprimet e Presidentit të Republikës të cilat veçse njollosin reformën dhe frymën mbi të cilën po krijohet ajo”, thuhet në letër.

“Situata po bëhet edhe më shqetësuese pas hapave të ndërmarrë rishtaz, të cilat kanë krijuar një kaos të vërtetë, dhe po e kthejnë vendin në aktor qesharak në raport me partnerët. Komisioni i Posaçëm, pasi ka miratuar Raportin Analitik në të njëjtën ditë ka miratuar në parim Dokumentin Strategjik dhe Plan veprimin, si dhe ka përcjellë në mënyrë krejtësisht arbitrare e të njëanshme aktet ligjore që parashikojnë ndryshime kushtetuese në Komisionin e Venecias”.

Ndërkohë që as Dokumenti strategjik dhe as Plan Veprimi nuk janë diskutuar dhe as miratuar në tërësi, me dakortësinë e të gjithë palëve, në turravrap, janë përcjellë një paketë ndryshimesh për të cilat duhet të shprehet një institucion prestigjioz ndërkombëtar, si Komisioni i Venecias, që ka treguar bujarinë dhe angazhimin serioz për të na asistuar në këtë proces”, shprehet Presidenti Nishani.

 

KOMENTO (0)

Shkruaj nje koment

    Pas