Sot 480 mijë nxënës nisin një vit të ri shkollor, që do të zhvillohet në kushte krejtësisht të panjohura dhe të pazakonta. Në këto rrethana, emocionet dhe buqetat e luleve do të zëvendësohen nga termometri, maskat dhe dizenfektuesit.
Mësimi me rregulla të reja, me disa turne, me orë të reduktuara dhe me rrezikun e infektimit ka shtuar ankthin tek prindërit, fëmijët dhe mësuesit. Më i vështirë normaliteti i ri do të jetë për 31 mijë nxënësit që ulen për herë të parë në bankat e shkollës.
Nga ana e saj, Ministria e Arsimit ka gati një plan me 3 mundësi për këtë vit, që lidhet ngushtë me shëndetin e nxënësve dhe mësuesve. Nga mësimi në auditore, ai i alternuar dhe ekstremi tjetër, krejtësisht online, askush nuk e di ende si do vijojë procesi.
Drejtoria e Përgjithshme e Arsimit Parauniversitar, me anë të një lajmërimi për mediat, u shpreh se është hartuar një formular për prindërit, ku ata do të japin përgjigje në lidhje me gjendjen shëndetësore të fëmijës së tyre.
