392 mijë nxënës të arsimit parauniversitar nisin sot vitin e ri shkollor. Këtë vit në bankat e shkollës, do të ulen për herë të parë rreth 27 mijë vogëlushë.
Pavarësisht fillimit të shkollës, shumë nxënës vijojnë të mos jenë të pajisur me libra. Edhe gjatë ditës së djeshme, njësoj si dy javët e fundit, prindër e fëmijë kanë mbajtur radhë në librari për të blerë tekstet shkollore.
Viti i ri shkollor është përshëndetur nga Ministri i Mirëqenies Sociale, Blendi Klosi. Nga shkolla profesionale “Stiliano Bandilli” në qytetin e Beratit, ai e ka cilësuar si arritje të punës dhe këmbënguljes rritjen e numrit të nxënësve sot në arsimin profesional.
Klosi tha se ky i fundit do të kthehet në identitet dhe vitin e ardhshëm do të ketë një numër edhe më të lartë nxënësish. “Ne do të ecim të sigurtë drejt arsimit profesional dhe do t’i kthejmë shkollat në qendra të rëndësishme multifunksionale ku tregu i punës do të gjejë mekanikun, hidraulikun, hotelierin, etj”, tha Klosi.
Një ditë më parë, me anë të një mesazhi të shpërndarë në rrjete sociale, Ministrja e Arsimit dhe Sportit, Lindita Nikolla, uroi gjithashtu nisjen e vitit të ri shkollor.
“Nesër është një ditë e veçantë për 27 mijë vogëlushë që nisin rrugëtimin me dijen. Për 392 mijë djem e vajza që i drejtohen shkollës dhe që në këto çaste po bëjnë përgatitjet me prindërit e tyre. Për 30 mijë mësues dhe edukatorë që, po ashtu, tashmë kanë përfunduar me përgatitjet e orarit, planeve mësimore e klasave. Bashkohem edhe unë me disa kolegë, për të uruar të gjithë ju. Suksese! Një urim e zotim të veçantë për fëmijët në nevojë, me aftësi të kufizuar e jetimë, për fëmijët nga komuniteti rom e egjiptian. Zotohemi se do të bëjmë dhe më shumë për ju krahas gjithë fëmijëve të tjerë. Po ndërtojmë, hap pas hapi, vetëdijen për ta ndryshuar mënyrën e të nxënit që ju është ofruar deri më sot, me të nxënit për të cilin ju keni nevojë“, shkruajti Nikolla./klan
